जनकपुर । मधेस प्रदेश सरकारको मन्त्रिपरिषद् आज विस्तार हुने भएको छ। मुख्यमन्त्री कृष्ण यादवको नेतृत्वमा सरकार गठन भएको केही समयपछि मात्र मन्त्रिपरिषद् विस्तार हुन लागेको हो।
मुख्यमन्त्रीको कार्यालयका अनुसार विभिन्न सत्तारुढ दलबाट ६ जना मन्त्री नियुक्त हुन लागेका छन्।
नेपाली कांग्रेसबाट श्याम पटेल कृषि मन्त्री तथा शंकर चौधरी वन तथा वातावरण मन्त्रीमा नियुक्त हुने भएका छन्। जनता समाजवादी पार्टी (जसपा)बाट राजकुमार गुप्ता भौतिक पूर्वाधार विकास मन्त्री र मनिष सुमन श्रम तथा यातायात मन्त्रीमा नियुक्त हुन लागेका छन्।
यसैगरी माओवादी केन्द्रबाट फकिरा महतो गृह मन्त्री र जनमत पार्टीबाट वसन्त कुशवाहा युवा तथा खेलकुद मन्त्रीमा नियुक्त हुन लागेको मुख्यमन्त्रीको कार्यालयले जनाएको छ।
नवनियुक्त मन्त्रीहरूको शपथग्रहण अहिले केही बेरमा ११ बजे प्रदेश प्रमुखको कार्यालयमा हुने प्रदेश प्रमुखको कार्यालयले जानकारी दिएको छ।
