पर्सा,१३ फागुन । पर्सागढी नगरपालिका वडा नं. ४ हरदासपुर थरुवान टोलमा आयोजित कार्यक्रममा विभिन्न दल परित्याग गरी सयौं युवा तथा महिलाहरू नेपाल कम्युनिष्ट पार्टी (एमाले)मा प्रवेश गरेका छन्।
कार्यक्रममा जनता समाजवादी पार्टी, नेपाल परित्याग गरेका २ सय ५१ जना युवा तथा महिलासहित जनमत पार्टी र नेपाली कांग्रेसका स्थानीय नेता–कार्यकर्ता समेत एमालेमा समाहित भएका हुन्।
जिल्ला उप–सचिव नबिजान अंसारी, एमाले नेता प्रदुमन प्रसाद यादव, सफीदेवान, अशोक यादव, रमेश यादव, वीरगञ्ज–१० का नेता प्रमोद गुप्ता, अंगद गुप्ता तथा अजय गुप्तालगायतका नेताहरूको पहलमा बुधबार आयोजित कार्यक्रममा नवप्रवेशीहरूलाई अबिर–टिका र गम्छा ओढाएर स्वागत गरिएको थियो।
कार्यक्रममा एमालेका केन्द्रीय सदस्य विजय सरावगी तथा प्रदेश उपाध्यक्ष बिचारी यादवले नवआगन्तुकहरूलाई पार्टीमा स्वागत गर्दै एमालेको नीति, विचार र विकासमुखी एजेण्डाबाट प्रभावित भई ठूलो संख्यामा युवा तथा महिलाहरू पार्टीमा आबद्ध भएको बताए।
जनमत पार्टीका पर्सागढी नगर सचिव सिकेन्द्र मण्डलको नेतृत्वमा सयभन्दा बढी नेता–कार्यकर्ता एमालेमा प्रवेश गरेका हुन् भने नेपाली कांग्रेसका स्थानीय नेता श्याम चौधरी र अवधलाल साह कानुको नेतृत्वमा पनि दर्जनौं कार्यकर्ता एमालेमा समाहित भएका छन्।
पार्टी प्रवेश गर्नेहरूमा जेन्जी नेता कमलेश कुमार साह, सरोज कुमार पटेल, मुन्ना देवी, राजकुमारी देवीलगायत रहेका छन्
नवप्रवेशीहरूले पर्सा निर्वाचन क्षेत्र नं. २ की उम्मेदवार रीमा कुमारी यादवलाई आगामी निर्वाचनमा विजयी गराउन एकजुट भएर लाग्ने प्रतिबद्धता व्यक्त गरेका छन्।
कार्यक्रममा बोल्दै नेताहरूले मधेसको विकास, सुशासन र स्थायित्वका लागि एमालेको नेतृत्व आवश्यक रहेको धारणा राखे। “पर्सा–२ को समृद्धि र जनताको अधिकार सुनिश्चित गर्न रीमा यादवलाई विजयी गराउन हामी सबै एकढिका भएर लाग्नेछौं,” नवप्रवेशी नेताहरूले संयुक्त प्रतिबद्धता जनाए।
एमाले नेताहरूले पार्टीमा भइरहेको प्रवेशले पर्सा क्षेत्रमा एमालेको जनाधार थप मजबुत भएको दाबी गर्दै आगामी निर्वाचनमा यसको सकारात्मक परिणाम आउने विश्वास व्यक्त गरेका छन्। कार्यक्रममा स्थानीय कार्यकर्ता तथा सर्वसाधारणको उल्लेखनीय उपस्थिति रहेको थियो।
