पर्सा,१३ फागुन । पर्सा निर्वाचन क्षेत्र नम्बर–३ मा चुनावी माहोल दिनप्रतिदिन तातिँदै जाँदा नेकपा (एमाले) का युवा उम्मेदवार रूपेश कुमार पाण्डे आक्रामक शैलीमा मैदानमा उत्रिएका छन। बिन्दवासिनी गाउँपालिका वडा नं. १ र २ मा बुधबार सम्पन्न घरदैलो अभियानले पर्सा–३ मा नयाँ राजनीतिक संकेत दिएको छ।
हरिनगर, गर्दौल र बहुअर्वा क्षेत्रका टोल–टोल पुगेर मतदातासँग प्रत्यक्ष संवाद गरेका पाण्डेले स्पष्ट शब्दमा भने, “म जे गर्छु, त्यही बोल्छु। पूरा नहुने आश्वासन दिएर राजनीति गर्ने मेरो शैली होइन।” उनको यो अभिव्यक्तिलाई धेरैले परम्परागत आश्वासनमुखी राजनीतिविरुद्धको चुनौतीका रूपमा लिएका छन।
पुराना अनुहारमाथि प्रश्न, नयाँ नेतृत्वमाथि भरोसा
पर्सा–३ मा वर्षौंदेखि दोहोरिँदै आएको अनुहार र अधुरा प्रतिबद्धताप्रति जनस्तरमा असन्तुष्टि बढिरहेको सन्दर्भमा पाण्डेको ‘कामको राजनीति’ नाराले युवादेखि कृषकसम्म आकर्षण बढाएको देखिन्छ। उनले शिक्षा, स्वास्थ्य, कृषि आधुनिकीकरण र स्थानीय रोजगारी सिर्जनालाई पहिलो प्राथमिकता दिने स्पष्ट रोडम्याप प्रस्तुत गरेका छन।
“तीन वर्षभन्दा बढी समयदेखि म क्षेत्रका गाउँ–गाउँ पुगेको छु। समस्या कागजमा होइन, जमिनमा बुझेको छु,” पाण्डेले भने, “अब पर्सा–३ लाई भाषण होइन, परिणाम चाहिन्छ।”
युवा शक्ति संगठित, अभियानमा उछाल
घरदैलो अभियानका क्रममा उल्लेखनीय रूपमा युवाहरूको उपस्थिति देखिएको थियो। स्थानीय युवाहरूले “यसपटक परिवर्तन, काम गर्ने नेतृत्व” भन्ने नारासहित पाण्डेको पक्षमा खुलेर समर्थन जनाएका थिए। एमालेका स्थानीय संरचना पनि सक्रिय रूपमा परिचालन हुँदा पर्सा–३ मा संगठनात्मक रूपमा एमाले बलियो देखिएको छ।
समसामयिक सन्दर्भ : विकास बनामव्यक्तिवाद
हालको राजनीतिक परिवेशमा व्यक्तिकेन्द्रित आरोप–प्रत्यारोपभन्दा विकास, सुशासन र पारदर्शिताको बहस बलियो बन्दै गएको छ। पाण्डेले यही एजेन्डालाई केन्द्रमा राख्दै आफू स्वच्छ छवि र स्पष्ट योजनासहित आएको दाबी गरेका छन।
उनको आक्रामक तर संयमित शैलीले पर्सा–३ मा मुख्य प्रतिस्पर्धालाई नयाँ मोड दिएको छ। परम्परागत समीकरण भत्काउने संकेत देखिँदै जाँदा चुनावी अंकगणितभन्दा पनि जनमतको मनोविज्ञान निर्णायक बन्ने आकलन गरिएको छ।
पर्सा–३ मा यसपटकको चुनाव केवल प्रतिनिधि चयन मात्र नभई, पुरानो राजनीतिक संस्कारको निरन्तरता वा नयाँ कार्यसंस्कृतिको सुरुवात भन्ने बहसमा केन्द्रित हुँदै गएको छ। र, यही बहसको केन्द्रमा अहिले युवा उम्मेदवार रूपेश कुमार पाण्डे उभिएका छन।
