मधेश प्रदेशका सभामुख मण्डलद्वारा पाँच सांसद पदमुक्त को को भए पदमुक्त ?

जनकपुरधाम। मधेश प्रदेशका सभामुख रामचन्द्र मण्डलले लगातार अनुपस्थित रहँदै आएका पाँच जना प्रदेशसभा सदस्यलाई पदमुक्त गरेका छन्।

सभामुख मण्डलले संविधान र प्रदेशसभा कार्य सञ्चालन नियमावलीका प्रावधानअनुसार लगातार १० वटा बैठकमा अनुपस्थित रहेका सांसदहरूमाथि कारबाही गरेका हुन्।

पदमुक्त हुनेमा नागरिक उन्मुक्ति पार्टीकी सांसद उर्मिला देवी सिंह, जसपा नेपालका सांसद मनिष कुमार सुमन, सञ्जय कुमार यादव, सिंहासन साह कलवार र सारदा संकर प्रसाद कलवार रहेका छन्।

सभामुख मण्डलले जारी गरेको सूचनामा “नेपालको संविधानको धारा १८० र मधेश प्रदेशसभा कार्य सञ्चालन नियमावली, २०७५ को नियम १८५ बमोजिम, प्रदेशसभाको अभिलेखअनुसार लगातार १० वटा बैठकमा अनुपस्थित रहेका निम्न नामका माननीय सदस्यहरू मिति २०८२।०७।२७ गतेदेखि प्रदेशसभा सदस्यबाट पदमुक्त भएका छन्।”

संविधानको धारा १८० (घ) अनुसार, प्रदेशसभा सदस्यले सभालाई सूचना नदिई लगातार १० बैठकमा अनुपस्थित रहेमा उनको स्थान रिक्त हुने व्यवस्था छ।

सभामुखको यस कदमलाई राजनीतिक रूपमा पनि अर्थपूर्ण रूपमा हेरिएको छ, किनकि हालै सभामुख मण्डलमाथि नै सात दलले अविश्वास (महाभियोग) प्रस्ताव दर्ता गरेका थिए। यस्तो परिस्थितिमा उनले विपक्षी गठबन्धनका सांसदमाथि गरेको कारबाहीले मधेश प्रदेशको राजनीतिक तनाव थप बढाउने अनुमान गरिएको छ।