धनगढी। नेपाली कम्युनिस्ट पार्टी (नेकपा)ले आगामी प्रतिनिधिसभा सदस्य निर्वाचनका लागि सुदूरपश्चिम प्रदेशमा उम्मेदवार चयन प्रक्रिया तीव्र बनाएको छ।
फागुन २१ गते हुने निर्वाचनलाई लक्षित गर्दै पार्टीले अधिकांश निर्वाचन क्षेत्रमा उम्मेदवारको टुंगो लगाइसकेको छ।
कैलाली जिल्लामा क्षेत्र नम्बर ५ बाट प्रेम आले, क्षेत्र नम्बर ४ बाट हरि चौधरी उत्सव, क्षेत्र नम्बर ३ बाट वीरमान चौधरी र क्षेत्र नम्बर २ बाट राजेन्द्र साउदलाई उम्मेदवार बनाउने निर्णय गरिएको छ। कैलाली क्षेत्र नम्बर १ मा भने उम्मेदवारको विषयमा अझै सहमति जुट्न बाँकी रहेको बताइएको छ।
यसैगरी कञ्चनपुर जिल्लामा क्षेत्र नम्बर १ बाट बीना मगर, क्षेत्र नम्बर २ बाट लालबहादुर खड्का र क्षेत्र नम्बर ३ बाट मानबहादुर सुनाको नाम उम्मेदवारका रूपमा टुंगिएको छ।
नेकपा नेता भीम रावल आफ्नो गृहजिल्ला अछाम क्षेत्र नम्बर १ बाट आफैं निर्वाचनमा प्रतिस्पर्धा गर्ने भएका छन् भने अछाम क्षेत्र नम्बर २ बाट शरदसिंह भण्डारीले पार्टीको टिकट पाएका छन्।
नेपाली कांग्रेसका निवर्तमान सभापति शेरबहादुर देउवाको गृहजिल्ला डडेल्धुरामा नेकपाबाट मानसिंह माल उम्मेदवार बन्ने भएका छन्। त्यस्तै दार्चुलाबाट लक्ष्मणदत्त जोशी, बझाङबाट मीनबहादुर कुँवरलाई उम्मेदवार चयन गरिएको छ।
बैतडीमा परमानन्द भट्टलाई उम्मेदवार बनाउने निर्णय गरेको नेकपाले डोटीमा सुदूरपश्चिम प्रदेशका पूर्वमुख्यमन्त्री त्रिलोचन भट्टलाई टिकट दिएको छ। बाजुराबाट भने हालै नेकपा एमाले परित्याग गरेका प्रकाशबहादुर शाहलाई उम्मेदवार बनाइएको छ।
पार्टीले बाँकी क्षेत्रका उम्मेदवारसमेत चाँडै सार्वजनिक गर्ने जनाएको छ।
