वीरगन्ज । मधेस प्रदेश सरकारमा पर्सा जिल्लाको राजनीतिक उपस्थिति थप सशक्त बनेको छ। मन्त्रिपरिषद् विस्तारसँगै पर्साबाट निर्वाचित दुई प्रदेशसभा सदस्य मन्त्रीमा नियुक्त भएपछि पर्सावासीका लागि यो निर्णय विशेष चासो र महत्वको विषय बनेको छ।
६ दलको समर्थनमा सरकार बनेको करिब एक महिनापछि गरिएको मन्त्रिपरिषद् विस्तारमा पर्सा निर्वाचन क्षेत्र नम्बर २ (क) बाट निर्वाचित श्याम पटेल र पर्सा क्षेत्र नम्बर ४ (क) बाट निर्वाचित शंकर चौधरी मन्त्रीमा समेटिएका हुन्।
नियुक्तिसँगै श्याम पटेलले भूमि व्यवस्था, कृषि तथा सहकारी मन्त्रालयको जिम्मेवारी पाएका छन्। यो मन्त्रालय पर्सा जस्तो कृषिमा आधारित जिल्लाका लागि प्रत्यक्ष रूपमा सरोकार राख्ने भएकाले स्थानीय किसान, सहकारी र भूमिहीन समुदायले ठूलो अपेक्षा राखेका छन्।
यस्तै शंकर चौधरीले वन तथा वातावरण मन्त्रालयको जिम्मेवारी पाएका छन्। वन, नदी, वातावरणीय संरक्षण र जलवायु प्रभावजस्ता विषय पर्साका लागि संवेदनशील रहेकाले यस मन्त्रालयको नेतृत्व पर्साकै सांसदले गर्नु जिल्लाका लागि महत्वपूर्ण मानिएको छ।
स्थानीय राजनीतिक वृत्तमा पर्साबाट दुई मन्त्री बन्नुले प्रदेश सरकारको नीति तथा बजेटमा पर्साको आवाज बलियो हुने अपेक्षा गरिएको छ। पूर्व–पश्चिम राजमार्ग, औद्योगिक क्षेत्र, कृषि आधुनिकीकरण र वातावरणीय व्यवस्थापनजस्ता विषयमा पर्साले प्रत्यक्ष लाभ लिन सक्ने विश्लेषकहरूको भनाइ छ।
मन्त्रिपरिषद् विस्तारसँगै पर्सावासीका लागि भने यो विस्तार जिल्लाको राजनीतिक पहुँच बढेको संकेत का रूपमा हेरिएको छ।
