छात्रालाई अनैतिक सम्बन्ध राख्न दबाब दिएकाे आराेपमा मधेस विश्वविद्यालयका कर्मचारी गद्दी पक्राउ

   प्रहरीका अनुसार, विश्वविद्यालयका कर्मचारी गद्दीले पीडित छात्रालाई सुरुमा सहयोगको बहानामा सम्पर्क बढाएका थिए । पछि फोन तथा सामाजिक सञ्जालमार्फत अनुपयुक्त सन्देश पठाउँदै निरन्तर मानसिक दबाब सिर्जना गरेको र प्रस्ताव अस्वीकार गरेपछि शैक्षिक भविष्य प्रभावित पार्ने धम्की दिएको आरोप लागेको छ ।

पीडित छात्राले दिएको उजुरीका आधारमा जिल्ला प्रशासन कार्यालय पर्सामा चैत १४ गते उजुरी दर्ता भएको थियो । उजुरी दर्ता भएपछि आरोपित फरार भएका थिए । जिल्ला प्रहरी कार्यालय पर्साको टोलीले खोजतलासका क्रममा उनलाई नियन्त्रणमा लिएको हो ।

पर्सा प्रहरीका प्रवक्ता तथा प्रहरी नायब उपरीक्षक हरि बहादुर बस्नेतले आरोपितमाथि आवश्यक कानुनी प्रक्रिया अघि बढाइएको र घटनाको विस्तृत अनुसन्धान भइरहेको बताए ।